لن نقبل بعزلنا.. باسيل: لسنا مع ربط لبنان بحروب لا مصلحة له فيها

قال رئيس "التيار الوطني الحر" النائب جبران باسيل في كلمة له خلال عشاء هيئة قضاء البترون: "هون البيت والأهل ورفاق الصغر ورفاق العمر، هون خلقنا وهون منندفن. هون منطلّع بماضي وتاريخ وتراث منعتز فيهم، وبحاضر منشوف حالنا فيه، وبمستقبل منحلم فيه. هون منقدّم مدينتنا ومنطقتنا نموذج لكيف منشوف لبنان يكون. كلما حدا قال لي شو حلوة البترون! بتعرفوا شو بحسّ؟ مش بالفرح والفخر، بشعر بالتقصير، وبفكر شو بعد عنا نعمل! صحيح عملنا كثير، بس بعد عنا أكثر بكثير لحتى توصل البترون لمحلّ ما منريد".

وأضاف: "ما رح قول شو عملنا للبترون لان الناس الأوادم ويلّي ما بيزعبروا بيعرفوا، مش مثل بعض النواب يلّي بيعرفوا بالخبر بالإعلام بيقوموا بيتبنوه، وهني بيكونوا مش بس مش حاكيين الوزير، هني بيكونوا ما بيعرفوه!".

وأشار إلى انه "لدينا مشكلة كثير كبيرة ومعيبة بحقنا بالبترون هي المستشفى، اليوم عندي أخبار حلوة عنها بعملية إعادة تأهيل نوعية إدارية وتنظيمية ومالية، وبدأت بمشروع توأمة لتكون مستشفى جامعي مع البلمند تحت إشراف مستشفى الروم ويكون عندها إدارة مالية وطبية وتقنية وتنظيمية تؤمن حاجات المنطقة الصحية". وأضاف: "شغلنا المطلوب إنمائياً للبترون ما زال كثير كبير ورح نقوم فيه ولو بظروف تمويلية أصعب من قبل".

وقال باسيل: "مطلوب منا نرجع للحالة الشعبية يلّي كنا فيها بالـ2018 وقبل، وما نترك الناس عرضة للتشويش والأكاذيب والأضاليل. مطلوب منا نتواصل مع الناس ونروح لعندها وندق على أبوابها ونحكي معها: يلّي زعلان أو مشوش عقله أو مخدوع أو عن حق عنده مشكلة والحق معه وعلينا. مطلوب منا وين غلطنا نقول غلطنا، بس ما نحمل يلّي ما غلطنا فيه، ولا ندافع عن أخطاء غيرنا. كل واحد مسؤول عن سياسته، ونحنا مش مسؤولين عن سياسة غيرنا. وين نحنا معه نقول نحنا معه، ووين نحنا ضد منقول نحنا ضده. مش مضطرين ندافع عن حدا عن غير قناعة، حملنا هالشي داخل التيار وخارجه، نحنا مع الدفاع عن لبنان ضد إسرائيل، بس مش مع ربط لبنان بحروب لا مصلحة له فيها". وشدد على انه "نحنا مع الشراكة والتوازن الوطني وعدم عزل أي مكوّن، بس ما منقبل يفرض حدا علينا خيارات سياسية أو إقتصادية مش مقتنعين فيها".