عايدك هوكستين يا فيروز؟

ألو، ألو؟ الرابية؟ ست الستات؟ فيروز يا فيروز، اشقتلك كتير يا فيروز، وكنت حابّة كتير زورِك، وإتمنّالك عيد سعيد وعمر مديد، بس لا تواخذيني، أنا وهالسيارة مش عم نمشي. الكلام بسرّك خايفين من الغارات، وما حابّين بالغلط نروح فدا حدا. بس اذا بتستقبليني، وحياتك بجي. فدا شوفتك، العمر بيرخص. شو؟ بتستقبليني؟ خليني بالبيت؟ الله يخليني خليني بالبيت؟ ليش ولو؟ لأنو بيتي انا بيتِك؟ إيه ما في شك، بس حابّة عايدك.

شو؟ بجي صوبك؟ بحلفلك بساكن العالي انو ما في خطر، هوكستين بلبنان، والأجواء رايقة نسبياً ببيروت. وبتعرفي شو؟ رح آخد جسر اللوزيّة، وبجبلك معي هديّة وقيّة لوز. شو؟ بعد ما ضحك اللوز وإنتي بتحبّيه أخضر متل لبنان؟ ما حابّة إفقسك يا ست فيروز، بس لبنان ما عاد أخضر غير بغنّياتك. طيّب شو رأيك بكيلو بندورة جبليّة، لا مرشوشة ولا مغشوشة من الجرد البندورة. بتعملّك حرقة البندورة؟ لكان بجبلك معي كيلو صابون. كل عمرو غير شكل الصابون، وفوقو 2 كيلو زيتون. شو؟ عبالك زيتون من الجنوب؟ ما حابّة عن جديد إفقسك يا فيروزتنا، بس بالجنوب لا عاد في بشر ولا حجر ولا شجر ولا زيتون ولا من يحزنون. في بس حزن كبير، بس ولا يهمّك، سنرجع يوماً.

شو قلتي؟ بطلع صوبك؟ وين شايفي في شتي؟ لأ، الطريق مش بحيرة والشارع مش غريق. هيك قالوا بالنشرة الجوية عالـ MTV؟ أصلاً الشتي خير، ومش إنتي بعضمة لسانك غنيّتي: "شتّي يا دنيّي ليزيد موسمنا ويحلا"؟ شو؟ إيه معك حق، أنا قلت بعضمة لساني إنو لا عاد في مواسم ولا شجر زيتون. بس ولا يهمّك، سنرجع يوماً. أيمتى هاليوماً؟ إنو شي يوماً من هالإيام، ليش بصلتك محروقة يا فيروز؟ روقي، ما بيكفّينا البلد كلّو محروق؟

شو؟ بجي لعندك؟ بشرفك علّي صوتك. صوتك بعيد، وصوتك هو العيد، وحامل وحدو الشمس والفيّ ولون التين والزيتون وريحة الطيّون… طيّونة؟ أنا قلت طيّونة؟ قلت طيّون يا ست فيروز. الطيّونة ريحتها ما بتسرّ الخاطر، قصفوها وريحتها ثاني أوكسيد الكاربون.

عَ فكرة ست فيروز، اتصل فيكي ماكرون وعايدك؟ شو بلا أصل هالماكرون. طيّب وهوكستين؟ ما قطع؟ أنا بقول أكيد رح يقطع، وساعتها دخيلك قوليلو ما بدنا نكمّل باللي بقيوا. برحمة سالم الغفيان ومغطّى بعلم لبنان، قوليلو ما بدنا نكمّل على لِ بقيوا. كرمال شادي لِ ضاع، ما بدّنا يضيع ما تبقّى من شبه وطن. قوليلو بدّنا يرجعوا النازحين والعصفورة يعششوا بالقرميد، وترجع المدارس أطفال وتلج وعيد، ونرجع من حرايق ومن شوارع هدّمتها حرب ما فيها تكافوء، وسلاح غير شرعي، وإنفجار نووي وحرب إنفرضت علينا فرض. ساعتها بس لبنان الحقيقي، لبنان الجمال والثقافة والحياة ممكن يرجع من جديد، ويشيل الوجوه المصبوغة والوعود المدموغة، وياخدهن الشتي... شو؟ على أساس أنا قلتلك ما في شتي؟ دايماً صدّقي أخبار الـ MTV يا فيروز، وخلينا بكلّ الأحوال نأجّل المعايدة لتصحى الدني.

جوزفين حبشي-نداء الوطن