ترامب هز العصا وايران عم تركض للتفاوض

صار مارق نحو أسبوع على انطلاق الحرب الإسرائيلية على ايران، لهلق سقط اكتر من 600 ضحية بايران مقابل 24 بإسرائيل.
وبوقت التصعيد العسكري مستمر من قبل إسرائيل وقرارن واضح باستكمال الحرب لتحقيق كل اهدافها، طيارات المفاوضات الايرانية جاهزة توصل عالبيت الأبيض لتتخلص من “الأسد الصاعد”، بس الرئيس الأميركي دونالد ترامب مسكر بابو بوج أي تفاوض بانتظار نتائج الحرب.
ليش فريق ربحان، مسيطر على كل الأجواء الإيرانية ومدمر نحو 40% من ترسانة الصواريخ الإيرانية بايام بدو يقعد تيفاوض اليوم؟
قالها ترامب بوضوح: في فرق كبير بين الوضع اليوم والوضع قبل أسبوع. والاسبوع المقبل رح يكون حاسم، ويمكن ما نكمل الأسبوع حتى.
يعني بين التهديد والسخرية، سكوا ركبن للايرانيين وعم يترقبوا أي تدخل أميركي مباشر بالحرب القائمة، خصوصة من بعد نقل واشنطن حاملة طائرات للشرق الأوسط ونقل أكثر من 30 طائرة عسكرية أميركية لأوروبا بالأيام الماضية.
وضع المنطقة ما ببشر بانفراج قريب، والوضع رايح نحو التصعيد، على أمل يتم تدارك الوضع بلبنان وما تتمدد هالاشتباكات لعنا، وتحديدا بعد كلام المصادر الايرانية للجزيرة انو التدخل الاميركي بالحرب سيجر حتما تدخل حزب الله، وخصوصا انو لبنان لليوم ما نفّذ بعد بند حصر السلاح، والخوف كبير انو تلجأ إسرائيل للقوة وتفتح حرب جديدة علينا لتتخلص مما تبقى من هالسلاح تماما متل ما عم تعمل بايران.