باسيل: أنا مرشّح طبيعي للرئاسة...واستعدوا للشارع!

قال رئيس التيّار الوطني الحرّ جبران باسيل في كلمة له خلال المؤتمر الوطني الثامن: "نحنا منبقى 14 آذار لمّا الكل بينسوه لأنّو الحريّة والسيادة والاستقلال مزروعين بجيناتنا الوطنية ولأنّو التحرير ما بيكمل الاّ بتحرّر اللبنانيين ودولتهم من ثنائية الفساد والتسلّط".

وأشار إلى أنه "هذه السنة الأسئلة وجوديّة، والخيارات بتتعلّق بالمصير، بتتعلّق بالجمهورية وبقاءها، والانهيار المتسارع بيفرض نلاقي حلول مش توصيف للمشاكل. نحنا بالتيار منملك الطرح ولكن ما منملك الحل لوحدنا. الطرح بيقدر يكون فردي اما الحل ما بيكون الاّ جماعي".

ورأى باييل أن "لبنان الكيان والوطن والدولة والنموذج والرسالة بخطر ووجودنا كلنا كلبنانين بخطر اذا استمرّينا متمترسين بمواجهة بعضنا ورافضين الحوار كطريق للخلاص. بلبنان ما في اغلبيّة نيابية لفريق لوحده وما رح تكون ولا يوم. مجبورين نتحاور ونتّفق، ولازم نطلع من تخوين بعضنا لأن ما في حل الاّ بالاتفاق". وأضاف: "بديل الحوار هو العنف، وحتى العنف بيخلص بالحوار. الاّ اذا واحد فكره يقضي على التاني، وما فيها جماعة بلبنان تفني جماعة تانية".

وشدد على أن "عصب التيار عم يقوى اكتر، بقضيّته ومبادئه. يلّي خايفين تجي الحلول على حسابنا، ويمشوا بالـ Deal بلانا بقلّن ان محاولة عزل التيار أحسن وصفة لتقويته، ولكن نتيجتها عاطلة عالوطن، لأن بناء الدولة رح يفشل من دوننا. هيك، منرجع على المعارضة الواضحة بالكامل، وهيك بتخدمونا!".

وقال: "معركة الاصلاح الزامية ومش ترف سياسي. لأن نحنا جماعة ما منقدر نعيش الاّ ضمن الدولة. الفساد والدولة ما بيتعايشوا، في واحد بيقضي على التاني".

من جهة أخرى، أشار إلى أن "جيلا بكامله عم يربى على فكرة انّو واحد متل رياض سلامة مش معقول يتحاكم او يتوقّف، متلما بإيامنا سيطرت فكرة انّو مش معقول يتحرّر لبنان. شباب لبنان اليوم فاقدين الأمل، بوقتها نحنا ما فقدناه وتحرّر لبنان وطلاّبنا هلّق ما رح يفقدوه ورح يتحاكم الحاكم".

وعن الانتخابات الرئاسية، قال: "انا مرشّح طبيعي ومنطقي كوني رئيس التيار صاحب أكبر كتلة نيابية. ما ترشّحت حتّى ما كون سبب للفراغ، وعملنا تنازل كبير للحل الكبير؛ فسّروا موقفنا المسهّل كأنه ضعف وشنّوا علينا حملة وعملوا رهانات خاطئة على شرذمة التيار وتفكيكه"، لافتا إلى أن "الحزب اكّد لي مراراً انّو مستحيل يطرح حدا او يقبل بحدا ما بقبل انا فيه. ولمّا سألت اذا تأمّن 65 صوت لسليمان فرنجية بتمشوا فيه بدوننا؟ زعلوا واجاني الجواب عدّة مرّات وعلى كلّ المستويات انّه كيف بتسمح لنفسك حتى تفكّر بالأمر؟ بعدين، شفنا اداء مختلف".

وأضاف: "يريدون رئيس يفصل لبنان عن العالم ومشكلة الساعة ليست طائفية انما دستورية وعنجهية ومن اخذوا القرار متخلفين ورجعيين وهذه مشكلة وطنية مع الوقت ونوعية الوقت ولن نسمح لكم بادارة البلد مثل قصة الساعة".

وعن حاكم مصرف لبنان رياض سلامة قال: "جيل بكامله عم يربى على فكرة انّو واحد متل رياض سلامة مش معقول يتحاكم او يتوقّف، متلما بإيامنا سيطرت فكرة انّو مش معقول يتحرّر لبنان! بتلاقي شباب لبنان اليوم فاقدين الأمل، بوقتها نحنا ما فقدناه وتحرّر لبنان وطلاّبنا هلّق ما رح يفقدوه ورح يتحاكم الحاكم"، لافتا إلى أن "شركة رجا سلامة تحوّل لها عمولة بقيمة 330 مليون دولار بس مش من مصرف لبنان! حتى اذا كان صحيح، قانون النقد والتسليف بيمنع العمولات وبيمنع الحاكم واي من اقربائه يشتغلوا بشي له علاقة بالمصرف المركزي! باعترافه،عم تتقاضى فوري عمولات على سندات خزينة للدولة، بس بيطلع بريء!".

وأضاف: "جرائمه متواصلة، وتعاميمه سرقة يومية مكشوفة وموصوفة مع عدّة اسعار للدولار (سعر رسمي- سعر صيرفة – سعر سوق سوداء – دولار جمركي – لولار وBira). بعد في محل بالعالم ما في سعر موحّد للعملة؟ ليش عنّا لا؟ لاستكمال سرقة اموال المودعين. تخيّلوا بيطلّع من يوم الجمعة تعميم يحدّد سعر الدولار لنهار الاثنين، او بيطلّع تعميمه نهار الجمعة وبيوقفه الثلاثاء، هيك بيسرق اموال الناس. بيمارس Haircut يومي على الودائع، ومخدّر اصحابهم بلعبة الدولار. بيطبع ليرات، وبيزيد التضخّم لاكثر من 300%، يعني اكثر من زمبابوي. بيطبع ليرات وبيشتري فيهم دولارات، وبيلعب بسعر صيرفة، وبيتلاعب بالدولار Yoyo طلوع نزول، وبيعمل 55% ارباح بثلاث ايام هو ومنظومته؛ سرقة اموال على الطالع وعلى النازل. بالتسعينات ثبّت الدولار على 1500 ليرة مع فوائد وصلت لـ 43% وحوّل البلد بوقتها لدكانة مراباة. اليوم، حوّله لصالة قمار للمضاربة على العملة حسب IMF، كل الشعب عم يلعب بالدولار وهو عم يلعب بالشعب... هيدي ما بدّها اثبات! القضاء وقّفه بس جهاز امني رسمي حاميه. هيدي حقيقة دامغة بتعرفها كل الناس! وبعده ما بيوحّد سعر الصرف، والسرقة ماشية".

وقال باسيل : "حرامي معلن بيشلّح المودعين اموالهم، والسياسيين المنتخبين من نفس المودعين بيحموه، والاعلاميين القابضين بيطبلوا له وبيتلاعبوا بالحقيقة ليغشّوا المودعين، وبعضهم بيصدّقوا! وبدكن يانا نتفرّج؟ لا! التيار وشبابه عم يتصدّوا لأكبر جريمة سرقة شهدها العصر .
معركتنا لتحرير بلدنا من يلّي سرقوا اموالنا مستمرّة".

وختم باسيل قائلا: "بدعيكم تستعدّوا للشارع لنهتف سوا: "مبارح وبكرا ومن زمان، نحنا السيادة بلبنان"! "اليوم وبكرا ومن زمان، نحنا الكرامة بلبنان"! مبارح واليوم وبكرا... تيار ووطني وحرّ!".